CRUZ DEL SUR - Blog de María Xosé Porteiro

 Era un absoluto descoñecido na política galega pero unha figura no seu Carballiño natal onde exercía como médico. A chegada de Pachi ao grupo parlamentario socialista naqueles anos turbulentos servíu de osíxeno a un equipo desmoralizado pola perda de apoio electoral e polo absoluto desencontro que vivía respecto da Executiva do partido en Galicia. En pouco tempo se fixo moi coñecido por facer unhas intervencións vehementes e arrolladoras nas que non deixaba títere con cabeza. Foi un pesadelo para o daquela presidente do Parlamento, o seu paisano Victorino Núñez, con quen mantivo unha relación que se podería calificar de calquera maneira agás cordial. A súa paixón por Ourense e pola súa vila, perfilárono axiña coma un candidato á alcaldía do Carballiño que podería ter moitas oportunidades, mesmo naqueles tempos difíciles para o socialismo en Galicia e no resto de España. Pachi foi unha das honrosas excepcións de Concellos gañados contra corrente. O seu liderado no Carballiño consolidouse co tempo e desde alí pasou a coordenar a tódolos socialistas ourensáns, creando un equipo que segue ao seu arredor e conformando un núcleo duro de traballo eficaz e leal. Algúns pensan que Pachi non é un pata negra do socialismo galego e poida que leven razón, pero sen dúbida é un Fórmula 1,  xa moi experimentado logo da súa etapa como Conselleiro de Medio Ambiente e actual Secretario Xeral. Este é o seu momento e apoios non lle fallan, como tampouco fallan os que esperan que se equivoque e sexa pasto do lume para as próximas autonómicas… son cousas da política, pero, aviso a navegantes: Pachi ten sólidos apoios e moitas persoas que se van deixar a pel para que chegue a bó termo. Sen irmos máis lonxe, o xoves pasado estivo arrodeado por tódolos altos cargos do goberno central  e representantes do poder lexislativo que proceden de Galicia, nunha cea organizada por Fernando González Laxe, coa axuda de Pilar Pin, que xa vai pola segunda edición. De tódolos presentes, o único que non tiña praza en Madrid era o Secretario Xeral dos socialistas galegos, pero ocupaba o lugar de honra naquela reunión na que se congregaron perto de cincuenta persoas. Pachi falou novamente con entusiasmo e debuxou unha situación para a acción política do PSdeG que, sen descoñecer as dificultades, se albisca como unha oportunidade. Radicalmente a prol das 50.000 persoas que se manifestaran hai unha semana en Santiago criticando a política lingüística de Núñez Feijóo e o seu goberno, foi  moi crítico co silencio de voces que aplaudiron os orzamentos á baixa da Xunta e non son quen de recoñecer o esforzo investidor e social dos do goberno central. Procurou a complicidade da súa audiencia comprometéndose a reforzar o debate ideolóxico nunhas siglas veteranas e imprescindibles para o devir  do país e da súa cidadanía, e, naquel encontro, demostrou que é unha opción con poder.  Para confirmalo, deberá ter a xenerosidade necesaria para pensar Galicia con visión estratéxica, ollada incluínte, corazón galeguista e mente socialdemócrata. Eis unha fórmula necesaria para o noso país.