CRUZ DEL SUR - Blog de María Xosé Porteiro

 http://www.xornal.com/opinions/2009/08/29/Opinion/xunta-perde-sur/2009082920521692623.html

XORNAL DE GALICIA. QUINTO  ELEMENTO. A  XUNTA PERDE O SUR. 30/08/09

Galicia limita ao sur co Estreito de Magalhâes. A constante perda de capital humano que sofríu o noso país durante case cen anos foi unha desgracia que o decorrer do tempo converteu en oportunidade. Milleiros de mulleres e homes de orixe labrega partiron nunha decisiva e dorosa ruptura cara a Arxentina, Uruguai, Venezuela, Cuba, México ou Brasil, deixando atrás subdesenvolvemento e atraso. No novo mundo atoparon sociedades democráticas, instrucción gratuita, traballo industrial, capacidade para emprendementos comerciais e a posibilidade de que a súa prole estudase e atopase traballos que os que quedaron aquí tardaron moitas décadas -guerra e posguerra incluidas-  en conseguir. Aqueles campesiños, probablemente analfabetos, que cruzaron o océano sen máis recursos que a forza de traballo e o impulso de supervivencia, viron como frolecían as súas sementes no alén agromadas en empresarios, médicos, mestres, operarios, artistas ou políticos con apelidos ben galegos. Esa Galicia trasterrada foi quen de construir identidade, símbolos e ideoloxía, como a bandeira, o himno ou o governo republicano no exilio, e de retribuir aos que resistían aquí con escolas, cartos e coidado da lingua e a cultura propias.